సోనియాతో వైయస్ భేటీ

న్యూఢిల్లీ: ఎఐసిసి అధ్యక్షురాలు సోనియా గాంధీతో ముఖ్యమంత్రి డాక్టర్ వైయస్ రాజశేఖర రెడ్డి మంగళవారం సాయంత్రం భేటీ అయ్యారు. సోనియా గాంధీ పిలుపు మేరకు ఆయన మంగళవారం మధ్యాహ్నం ఢిల్లీకి చేరుకున్నారు. వెంటనే ఆయన కాంగ్రెస్ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీతో సమావేశమయ్యారు. అనంతరం ఆయన సోనియా గాంధీ సలహాదారు అహ్మద్ పటేల్ తో సమావేశమయ్యారు. తాను పార్టీ వ్యవహారాల మీద ఇక్కడికి వచ్చానని, ప్రభుత్వ వ్యవహారాలైతే మీడియాకు వెల్లడించడానికి వీలుంటుందని ఆయన మీడియా ప్రతినిధులతో అన్నారు.

ఇటీవలి సీనియర్ కాంగ్రెస్ నాయకులతో జరిగిన సమావేశం వివరాలను అహ్మద్ పటేల్ రాజశేఖర రెడ్డికి వివరించినట్లు సమాచారం. సోనియాతో భేటీలో ఈ విషయం కూడా చర్చకు వచ్చే అవకాశం ఉంది. అలాగే తెలంగాణ రాష్ట్ర సమితి (తెరాస) రాజీనామాల వల్ల ఖాళీ అయిన నియోజకవర్గాలకు జరిగే ఉప ఎన్నికలపై ముఖ్యమంత్రితో సోనియా మాట్లాడే అవకాశం ఉంది. అంతేకాకుండా ప్రదేశ్ కాంగ్రెస్ కమిటీ (పిసిసి) అధ్యక్షుడి ఎన్నిక చాలా కాలంగా వాయిదా పడుతూ వస్తోంది. దీనిపై ప్రధానంగా చర్చ జరిగే అవకాశం ఉంది. పిసిసి అధ్యక్ష పదవికి మల్లు రవి, వి. హనుమంతరావు, పొన్నాల లక్ష్మయ్య, డి. శ్రీనివాస్ పేర్లు వినిపిస్తున్నాయి.