పవన్ కల్యాణ్ 'జల్సా' ఫస్ట్ రిపోర్ట్

హైదరాబాద్: ప్రపంచవ్యాప్తంగా వెయ్యి థియేటర్లలో బుధవారం ఉదయమే విడుదలైన పవన్ కళ్యాణ్ "జల్సా" పై మిశ్రమ స్పందన వ్యక్తమవుతోంది. "ఖుషీ" తర్వాత పవన్ కల్యాణ్ కు ఇది పెద్ద హిట్ అవుతుందని ఆశింఛిన అభిమానులు అర్ధరాత్రి నుంచి సినిమా థియేటర్ల వద్ద పడిగాపులు పడ్డారు. ప్రతిభావంతుడైన దర్శక, రచయిత త్రివిక్రం శ్రీనివాస్ ఈ సినిమాకు దర్శకత్వం వహించడం, ఇలియానా అందాలు ఆరబోయడం సినిమాపై అంచనాలను పెంచాయి.

అయితే "జల్సా"చూసినవారు పెద్ద ఖుషీగా ఉండలేకపోతున్నారని తెలుస్తోంది. ఈ సినిమా ఓపెనింగ్స్ అద్భుతంగా ఉన్నా రెండో వారం నుంచి కలెక్షన్లు మందగించవచ్చని ట్రేడ్ నిపుణులు చెబుతున్నారు. పాత కథ, సెకండాఫ్ మందగించడం, బలహీనమైన స్క్రీన్ ప్లే, ఆసక్తి లేని క్లెయిమాక్స్ సినిమాను దెబ్బతీశాయి. ఈ వేసవిలో ఇదే పెద్ద సినిమా కావడంతో బయ్యర్లకు నష్టం ఉండకపోవచ్చని ఒక అంచనా.