ఇది పుట్టిన రోజు కానుక: జయప్రద

హైదరాబాద్: ఎన్నికల నియమావళి ఉల్లంఘన కేసులో కోర్టు తీర్పు తనకు రేపటి పుట్టిన రోజు కానుకగా భావిస్తున్నానని సినీ నటి, పార్లమెంటు సభ్యురాలు జయప్రద అన్నారు. 2002లో జరిగిన హైదరాబాదు నగర పాలక సంస్థ ఎన్నికల్లో ఎన్నికల నియమావళిని ఉల్లంఘించారంటూ జయప్రద, తెలుగుదేశం మాజీ పార్లమెంటు సభ్యుడు ఎస్. వేణుగోపాలాచారి తదితరులపై కేసు నమోదైంది. తగిన సాక్ష్యాధారాలు చూపించలేదంటూ వారిపై కేసును కోర్టు బుధవారం కొట్టేసింది. కోర్టు తీర్పు తనకు ఆనందం కలిగించిందని జయప్రద అన్నారు.

రాజకీయ కుట్రలో భాగంగానే తనపై తప్పుడు కేసు బనాయించారని ఆమె విమర్శించారు. తాను గత ఆరేళ్లుగా మానసిక క్షోభను అనుభవించానని ఆమె చెప్పారు. రాజకీయ ఒత్తిళ్లకు తలొగ్గి తనపై తప్పుడు కేసును బనాయించారని ఆమె అన్నారు. తాను ఆంధ్రప్రదేశ్ లో ఉన్నా, ఉత్తరప్రదేశ్ లో ఉన్నా చట్టాన్ని గౌరవిస్తానని, న్యాయస్థానంపై తనకు నమ్మకం ఉందని ఆమె అన్నారు.