బాబుకు, స్పీకరుకు మధ్య లడాయి

హైదరాబాద్: ప్రతిపక్ష నాయకుడు నారా చంద్రబాబునాయుడుకు, స్పీకర్ కె.అర్. సురేష్ రెడ్డికి మధ్య బుధవారం శాసనసభలో తీవ్ర వాగ్వివాదం చెలరేగింది. చంద్రబాబుపై స్పీకర్ తీవ్ర ఆగ్రహం వ్యక్తం చేశారు. తమకు మాట్లాడాడనికి అవకాశం ఇవ్వడం లేదని చంద్రబాబు స్పీకరుపై విమర్శలు చేశారు. గనుల శాఖా మంత్రి సబితా ఇంద్రారెడ్డి మాట్లాడుతుండగా తెలుగుదేశం సభ్యులు అభ్యంతరం తెలిపారు. వివరణకు తమకు అవకాశం ఇవ్వాలని తెలుగుదేశం సభ్యులు పట్టుబట్టారు. దీనికి స్పీకర్ నిరాకరించారు. దీంతో చంద్రబాబు స్పీకరుపై ఆసహనం వ్యక్తం చేశారు.

చంద్రబాబు తీరుపై స్పీకర్ ఆగ్రహం వ్యక్తం చేశారు. తమాషా చేస్తున్నారా అని ఆయన అన్నారు. తాను ఆదేశాలు ఇస్తున్నానని, తన సహనానికి కూడా హద్దులు ఉంటాయని ఆయన అన్నారు. క్షణం క్షణం తన సహనాన్ని పరీక్షించడం సరి కాదని ఆయన అన్నారు. నిరంతరాయంగా అడ్డు తగులుతున్నారని ఆయన అన్నారు. తెలుగుదేశం సభ్యులు వెల్ లోకి దూసుకొచ్చే ప్రయత్నం చేశారు. ఇదేమిటి, సరి కాదని స్పీకర్ అన్నారు.