మాది ఎన్టీఆర్ స్కీం కాదు: రోశయ్య

హైదరాబాద్: ఎన్టీరామారావు ప్రవేశపెట్టిన రెండు రూపాయలకు కిలో బియ్యం పథకంతో తాము ప్రవేశపెడుతున్న రెండు రూపాయలకు కిలో బియ్యం పథకానికి ఏ సంబంధమూ లేదని ఆర్థిక మంత్రి కె. రోశయ్య అన్నారు. నిత్యావసర సరుకుల ధరలు విపరీతంగా పెరిగాయని, వాటిని అదుపు చేయడం కష్టమవుతోందని, ఈ స్థితిలో పేదలకు ఇబ్బంది కలగకుండా తాము రెండు రూపాయలకు కిలో బియ్యం పథకాన్ని ప్రారంభిస్తామని ఆయన మంగళవారం మీడియా ప్రతినిధుల సమావేశంలో చెప్పారు.

ప్రభుత్వంపై ప్రతిపక్షాలు విమర్శలు మానుకోవాలని ఆయన సూచించారు. మే నెల నుంచి చౌక ధరల దుకాణాల ద్వారా పేదలకు పప్పులు, మంచి నూనె సరఫరా చేస్తామని ఆయన చెప్పారు. ప్రభుత్వంపై తెలుగుదేశం పార్టీ అనవసరమైన విమర్శలు చేస్తోందని ఆయన అన్నారు.