అమీర్ ఖాన్ పై వారంట్స్

కచ్: జింకకు సంబంధించిన కేసులో సినీ నటుడు అమీర్ ఖాన్ కు, మరో నలుగురికి బెయిలబుల్ వారంట్స్ అందజేయడానికి కచ్ పోలీసులు బయలుదేరారు. లగాన్ సినిమాలో అనుమతి లేకుండా జింకను వాడినందుకు అమీర్ ఖాన్ పై, సినిమా దర్శకుడు అసుతోష్ గోవారికర్, అమీర్ ఖాన్ మాజీ భార్య రీనా దత్తా, ఫొటోగ్రాఫర్ అశోక్ మెహతాలపై కేసు నమోదైంది. వారంట్స్ ను జారీ చేయడానికి కచ్ పోలీసులు ముంబయి, బెంగుళూర్ పోలీసు కమీషనర్ల సాయం తీసుకుంటారు.

భుజ్ కోర్టు మార్చి 27వ తేదీన ఆ ఐదుగురిపై బెయిలబుల్ వారంట్స్ జారీ చేసింది. ఏప్రిల్ 15వ తేదీన తమ ముందు హాజరు కావాలని చీఫ్ జ్యుడిష్యల్ మెజిస్ట్రేట్ ఆ ఐదుగురిని ఆదేశించారు. అటవీ శాఖ అధికారులు పంపిన నోటీసులకు ప్రతిస్పందించకపోవడంతో డిప్యూటీ ఫారెస్టు ఆఫీసర్ జె.వి. వ్యాస్ కోర్టులో ఆ ఐదుగురిపై ఫిర్యాదు చేశారు. ఐదుగురిలో అశోక్ మెహతా బెంగుళూర్ లో ఉంటాడు. మిగతా నలుగురు ముంబయిలో ఉంటున్నారు. వన్యప్రాణులకు సంబంధించిన ప్రభుత్వేతర సంస్థ యూత్ నేచర్ క్లబ్ తాజాగా ఫిర్యాదు చేయడంతో కేసును మళ్లీ చేపట్టారు.