కెసిఆర్ దిమ్మ తిరుగుతుంది: జీవన్

హైదరాబాద్: వచ్చే ఉప ఎన్నికల్లో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు దిమ్మ తిరుగుతుందని రాష్ట్ర రోడ్లు భవనాల మంత్రి టి. జీవన్ రెడ్డి అన్నారు. కెసిఆర్ పై ఆయన మరోసారి ధ్వజమెత్తారు. కెసిఆర్ ఈ ఎన్నికల్లో చావు దెబ్బ తింటారని ఆయన గురువారం మీడియా ప్రతినిధులతో అన్నారు. వాస్తవాలను వక్రీకరించేవారి నాలుకలను ప్రజలు తెగ గోస్తారని ఆయన అన్నారు.

ఉప ఎన్నికలు తెలంగాణ ఉద్యమానికి ఊతం ఇస్తాయని ఒకసారి, వచ్చే ఎన్నికలకు ఈ ఉప ఎన్నికలు ఉపయోగపడుతాయని మరోసారి కెసిఆర్ అంటున్నారని, కెసిఆర్ వాస్తవాలను వక్రీకరించి మాట్లాడుతున్నారని ఆయన అన్నారు. మాటలు మారుస్తూ కెసిఆర్ తెలంగాణ ప్రజలను అవమానిస్తున్నారని ఆయన అన్నారు.