ఎన్నికల లబ్ధికి వైయస్ ఎత్తులు: టిడిపి

హైదరాబాద్: ఎన్నికల్లో లబ్ధి పొందడానికే ముఖ్యమంత్రి డాక్టర్ వైయస్ రాజశేఖర రెడ్డి బందరు నౌకాశ్రయానికి శంకుస్థాపన చేస్తున్నారని తెలుగుదేశం పార్టీ శాసనసభ్యుడు దేవినేని ఉమామహేశ్వర రావు విమర్శించారు. శంకుస్థాపన చేసి తాము పని చేశామని చెప్పుకోవడానికి ముఖ్యమంత్రి ప్రయత్నిస్తున్నారని, అయితే దాని పట్ల ముఖ్యమంత్రికి చిత్తశుద్ధి లేదని ఆయన బుధవారం మీడియా ప్రతినిధులో అన్నారు. నౌకాశ్రయానికి చెందిన పర్యావరణ అనుమతులను వెల్లడించాలని ఆయన డిమాండ్ చేశారు.

అఖిలపక్ష సమావేశంలో చర్చించిన తర్వాతనే బందరు పోర్టు విషయంలో నిర్ణయం తీసుకుంటామని ముఖ్యమంత్రి హామీ ఇచ్చారని, ఇప్పుడు ఆ హామీకి విరుద్దంగా వ్యవహరిస్తున్నారని, అఖిల పక్ష సమావేశం ఏర్పాటు చేసి పారదర్శకంగా వ్యవహరించాల్సిన అవసరం ఉందని ఆయన అన్నారు. పోర్టు భూములను పార్లమెంటు సభ్యులకు, శాసనసభ్యులకు కేటాయిస్తే పోర్టుకు భూమి ఎలా మిగులుతుందని ఆయన అడిగారు.