బాబువన్నీ వేషాలు: వైయస్

విశాఖపట్నం: ఎన్నికలు వస్తున్నాయి కాబట్టి తెలుగుదేశం పార్టీ అధ్యక్షుడు నారా చంద్రబాబునాయుడు వేషాలు వేస్తున్నారని ముఖ్యమంత్రి డాక్టర్ వైయస్ రాజశేఖర రెడ్డి వ్యాఖ్యానించారు. గుడిసె ముందు నిలబడి చంద్రబాబు పిల్లకు జడ వేసుకోవడం నేర్పిస్తున్నారని, ఎన్నికల కోసం చంద్రబాబు ఎన్ని వేషాలైనా వేస్తారని ఆయన అన్నారు. విశాఖపట్నంలో ఆయన బుధవారం వివిధ అభివృద్ధి కార్యక్రమాలకు శ్రీకారం చుట్టారు. వేషాలు వేస్తున్న చంద్రబాబుకు ప్రజలు సరైన సమాధానం చెప్తారని ఆయన అన్నారు.

పదేళ్ల పాలనలో చంద్రబాబు చేసిన నిర్వాకం ఏమిటని ఆయన ప్రశ్నించారు. చంద్రబాబు పదేళ్లలో చేయలేని పనులను తాము నాలుగేళ్లలో చేశామని ఆయన చెప్పారు. ఎన్నికలు వస్తున్నందున చంద్రబాబు మాటలు చెబుతున్నారని, పదేళ్లలో చేయని పనులను మళ్లీ అధికారంలోకి వస్తే చేస్తామని చెపుతున్న చంద్రబాబును ప్రజలు నమ్మరని ఆయన అన్నారు. తాము ప్రజలకు ఇచ్చిన హామీలను నెలవేర్చడానికి చర్యలు తీసుకుంటున్నామని ఆయన చెప్పారు. విశాఖపట్నంలో ఆయన ప్రజాపథం నిర్వహించారు. రాజీవ్ స్వగృహ ఇళ్లకు శ్రీకారం చుట్టారు. మత్స్యకారులకు బీమా పథకాన్ని ప్రారంభించారు.