కష్టపడితే అధికారం ఖాయం: బాబు

గుంటూరు: తొమ్మిది నెలలు కష్టపడితే తమ పార్టీకి అధికారం ఖాయమని తెలుగుదేశం పార్టీ అధ్యక్షుడు నారా చంద్రబాబునాయుడు అన్నారు. అవినీతి కాంగ్రెస్ ప్రభుత్వాన్ని గద్దె దించడానికి ప్రతి ఒక్కరూ కృషి చేయాలని ఆయన పార్టీ కార్యకర్తలకు పిలుపునిచ్చారు. మీ కోసం యాత్రలో భాగంగా ఆయన శుక్రవారం గుంటూరు జిల్లా కారంపూడిలో పార్టీ కార్యకర్తల విస్తృత స్థాయి సమావేశంలో ప్రసంగించారు.

తాము అధికారంలోకి వస్తే బిసి, ఎస్సీ, ఎస్టీలను, చేతి వృత్తులవారిని ఆదుకుంటామని ఆయన చెప్పారు. రాష్ట్రంలో ఆదాయం, సంపద పెరిగిందని, ఆర్థిక సంస్కరణలతో అది సాధ్యమైందని, అయితే ఆ ఫలాలు సామాన్యులకు అందడం లేదని చంద్రబాబు అన్నారు. అధికారంలోకి వస్తే పల్నాడును పర్యాటక కేంద్రంగా తీర్చిదిద్దుతామని ఆయన హామీ ఇచ్చారు.