కెసిఆర్ నోటికొచ్చిందంటున్నారు: వైయస్

న్యూఢిల్లీ : తెలంగాణ ఏర్పాటు చేసే అంశానికి ప్రస్తుతం జరుగనున్న ఉపఎన్నికలు రెఫరెండం కాదని ముఖ్యమంత్రి వైఎస్ స్పష్టం చేశారు. తెలంగాణపై సెంటిమెంట్‌ తమకు లేదని ఎప్పుడూ చెప్పలేదని ఆయన అన్నారు. ఉప ఎన్నికలు తెలంగాణకు రెఫరెండం అనే తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు వాదనను ఆయన గురువారం సాయంత్రం మీడియా ప్రతినిధులతో అన్నారు. కెసిఆర్ నోటికి ఏది వస్తే అది మాట్లాడుతున్నారని, రెఫరెండం అనే మాట ఈ ఎన్నికలకు వర్తించదని ఆయన అన్నారు.

ఉపఎన్నికల్లో మెజార్టీ స్థానాలను తాము గెలుచుకుంటామని విశ్వాసం వ్యక్తం చేశారు. ఏ ఎన్నికలకు ఉండాల్సిన ప్రాముఖ్యత ఆ ఎన్నికలకు ఉంటుందని, అయితే గెలుపు అవకాశాలను అనేక అంశాలు ప్రభావితం చేస్తాయని ఆయన అన్నారు. తాము సెంటిమెంటు అంశంపై ఎన్నికలకు పోవడం లేదని ఆయన చెప్పారు. గతంలో జరిగిన కరీంనగర్ లోకసభ ఉప ఎన్నిక రెఫరెండం అని ఎలా భావించారని అడిగితే ఆయన సూటిగా సమాధానం ఇవ్వలేదు. ఏదైనా ఒక అంశంపైన ఎన్నికలు జరిగితేనే రెఫరెండం అని ఆయన అన్నారు.