రాజకీయాలు మరోసారి: అశ్వనీదత్

తిరుపతి: మళ్లీ తిరుమల శ్రీవేంకటేశ్వర స్వామి దర్శనానికి వచ్చినప్పుడు రాజకీయాల గురించి మాట్లాడుతానని జూనియర్ ఎన్టీఆర్ నటించిన కంత్రీ సినిమా నిర్మాత అశ్వనీదత్ అన్నారు. కంత్రీలో రాజకీయాంశాలు ఉన్నాయనే వార్తలపై ఆయన ఆ విధంగా ప్రతిస్పందించారు. కంత్రీ సినిమా రీళ్ల బాక్స్ కు నిర్మాత అశ్వనీదత్, దర్శకుడు మెహర్ రమేష్ శ్రీవారి సన్నిధిలో ఉంచి పూజలు చేశారు.

జగదేకవీరుడు సినిమా నుంచి తాను ఈ విధంగా శ్రీవారి వద్ద రీళ్లకు పూజలు చేస్తున్నానని, అదే పద్ధతిలో కంత్రీ సినిమా రీళ్లకు పూజలు చేశానని అశ్వనీదత్ చెప్పారు. తన మిగతా సినిమాల్లాగే కంత్రీ కూడా విజయం సాధిస్తుందని ఆయన ఆశాభావం వ్యక్తం చేశారు. శ్రీవారి ఆశీస్సులు తనకు లభించాయని ఆయన చెప్పారు.