పెట్రో ధరల పెంపుపై ఆందోళన: దత్తాత్రేయ

హైదరాబాద్: పెట్రోల్, డీజిల్, వంటగ్యాస్ ధరల పెంపునకు వ్యతిరేకంగా రాష్ట్రవ్యాప్తంగా ఆందోళన చేపడతామని భారతీయ జనతా పార్టీ (బిజెపి) రాష్ట్రాధ్యక్షుడు బండార దత్తాత్రేయ చెప్పారు. రేపు జిల్లా కేంద్రాల్లో ధర్నాలు చేయనున్నట్లు ఆయన బుధవారం తెలిపారు. పెట్రోల్ ధరను లీటరుకు 5 రూపాయలు, డీజిల్ ధరను లీటరుకు 3 రూపాయలు, వంటగ్యాస్ ధరను సిలిండర్ కు 50 రూపాయలు పెంచాలని కేంద్ర ప్రభుత్వం నిర్ణయించింది. పెరిగిన ధరలు ఈ అర్థరాత్రి నుంచే అమలులోకి వస్తాయి. ఈ ధరల పెంపుపై భవిష్యత్తులో మండల స్థాయిల్లో ఆందోళనకు దిగుతామని బండారు దత్తాత్రేయ చెప్పారు.

కేంద్ర ఫ్రభుత్వ అసమర్థత వల్ల ధరలు పెరిగాయని ఆయన విమర్శించారు. కేంద్ర ఆర్థిక విధానాల లోపం కూడా ధరల పెరుగుదలకు కారణమని ఆయన అన్నారు. సామాన్యులపై, రైతులపై ఈ ధరల పెరుగుదల భారం పడుతుందని ఆయన అభిప్రాయపడ్డారు. ప్రయాణ ఛార్జీలు కూడా పెరిగి ప్రజలు ఇబ్బందులకు గురవుతారని ఆయన అన్నారు. వంటగ్యాస్ ధర పెంపు వల్ల మహిళా లోకంపై భారం పడుతుందని, ఇప్పటికే గ్యాస్ కొరతతో బాధ పడుతున్నారని ఆయన అన్నారు.