తెరాస అధ్యక్షుడిగా కెసిఆర్ రాజీనామా

హైదరాబాద్: తెలంగాణ రాష్ట్ర సమితి (తెరాస) అధ్యక్ష పదవికి కె. చంద్రశేఖరరావు రాజీనామా చేశారు. తన రాజీనామాను ఆమోదించాలని ఆయన మంగళవారం పార్టీ కార్యవర్గానికి లేఖ రాశారు. ఉప ఎన్నికల్లో పార్టీ దెబ్బ తిన్నందుకు నైతిక బాధ్యత వహిస్తూ ఆయన రాజీనామా చేశారు. తెరాస ప్రధాన కార్యదర్శి మధుసూదనాచారికి ఆయన తన లేఖను అందజేశారు. కెసిఆర్ రాజీనామా చేయకుండా నివారించేందుకు పార్టీ నేతలు ప్రయత్నిస్తున్నారు. తన నిర్ణయంలో మార్పు లేదని కెసిఆర్ ముఖ్యనాయకులకు చెప్పారని సమాచారం.

కెసిఆర్ రాజీనామా వార్తతో పార్టీ నాయకులు పార్టీ కార్యాలయం తెలంగాణ భవన్ కు చేరుకుంటున్నారు. ఎన్నికల ఫలితాలు వెలువడినప్పటి నుంచి ఆయన బయటకు రాలేదు. మీడియాతో మాట్లాడడానికి కూడా ఆయన ఇష్టపడడం లేదు. గత మూడు రోజులుగా కెసిఆర్ ముఖ్య నాయకులతో, సన్నిహితులతో మాట్లాడారు. రాజీనామా లేఖలో మూడు వాక్యాలు మాత్రమే రాశారు. పార్టీ అపజయానికి నైతిక బాధ్యత వహిస్తూ తాను రాజీనామా చేస్తున్నట్లు ఆయన ఆ లేఖలో రాశారు. సిద్ధిపేటలో ఉన్న శాసనసభ్యుడు, కెసిఆర్ మేనల్లుడు హైదరాబాద్ వచ్చారు.