హైదరాబాదులో ఎడ్యుకేషన్ కాంప్లెక్స్

హైదరాబాద్: హైదరాబాదులో ఎడ్యుకేషన్ కాంప్లెక్స్ ను ఏర్పాటు చేయాలని రాష్ట్ర ప్రభుత్వం నిర్ణయించింది. విద్యపై ముఖ్యమంత్రి బుధవారం ఉన్నతస్థాయి సమీక్షా సమావేశం నిర్వహించారు. ఈ సమావేశంలో ఆ మేరకు నిర్ణయం తీసుకున్నారు. మరో 6 జిల్లాల్లో విశ్వవిద్యాలయాలను ఏర్పాటు చేయనున్నట్లు ఉన్నత విద్యా మంత్రి ఆర్. చెంగారెడ్డి సమావేశానంతరం మీడియా ప్రతినిధులతో చెప్పారు.

మహబూబ్ నగర్, కరీంనగర్, శ్రీకాకుళం, నెల్లూరు, మచిలీపట్నం, కర్నూలుల్లో ఈ విశ్వవిద్యాలయాలను ఏర్పాటు చేయనున్నట్లు ఆయన తెలిపారు. రాష్ట్రంలో 19 డిగ్రీ కళాశాలలను, 8 జూనియర్ కళాశాలలను, 8 పాలిటెక్నిక్ కళాశాలలను నెలకొల్పుతామని ఆయన చెప్పారు. జూనియర్ కళాశాలల్లో వేయి, డిగ్రీ కళాశాలల్లో 500, విశ్వవిద్యాలయాల్లో 700 పోస్టులను భర్తీ చేయనున్నట్లు ఆయన తెలిపారు. డిగ్రీ, జూనియర్ కళాశాలల్లో పనితీరును బట్టి రిటైర్డ్ అధ్యాపకులను నియమిస్తామని కూడా ఆయన చెప్పారు.