మంత్రివర్గ విస్తరణ లేదు: మొయిలీ

న్యూఢిల్లీ: రాష్ట్ర మంత్రివర్గ విస్తరణ ఇప్పట్లో ఉండదని కాంగ్రెస్ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ చెప్పారు. ముఖ్యమంత్రి డాక్టర్ వైయస్ రాజశేఖర రెడ్డి ఈ నెల 18వ తేదీ ఢిల్లీ పర్యటన ఇంకా ఖరారు కాలేదని ఆయన బుధవారం మీడియా ప్రతినిధుల సమావేశంలో చెప్పారు. రాష్ట్రానికి సంబంధించి భవిష్యత్తు కార్యాచరణ నివేదికను తాము తమ పార్టీ అధ్యక్షురాలు సోనియా గాంధీకి అందించినట్లు ఆయన తెలిపారు.

ప్రదేశ్ కాంగ్రెస్ కమిటీ (పిసిసి)ని 20 రోజుల్లో పునర్వ్యస్థీకరిస్తామని ఆయన చెప్పారు. పార్టీని పై నుంచి కింది స్థాయి వరకు ప్రక్షాళన చేస్తామని ఆయన చెప్పారు. ముఖ్యమంత్రి డాక్టర్ వైయస్ రాజశేఖర రెడ్డిపై తీవ్రంగా విమర్శలు చేస్తున్న పార్లమెంటు సభ్యుడు హరిరామ జోగయ్య, సీనియర్ శాసనసభ్యుడు ఉప్పునూతల పురుషోత్తమ రెడ్డిలపై చర్యలు తీసుకోవడంపై వేసిన ప్రశ్నలకు ఆయన జవాబులు దాటవేశారు.