తెలంగాణవాదులు ఏకం కావాలి: కెసిఆర్

హైదరాబాద్: తెలంగాణవాదులందరూ ఏకం కావాల్సిన సమయం ఆసన్నమైందని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు అన్నారు. ఎవరు వచ్చినా తాము స్వాగతిస్తామని ఆయన శుక్రవారం ఒక ప్రైవేట్ తెలుగు టీవీ చానెల్ ప్రతినిధితో అన్నారు. తెలంగాణవాదుల ఐక్యతకు ఇతరులు చొరవ తీసుకున్నా తమకు అభ్యంతరం లేదని, లేదంటే తాము చొరవ చూపిస్తామని ఆయన అన్నారు.

తెలంగాణవాదులు ఏకం కావడంలో రాజకీయం సమస్య కాకూడదని, తెలంగాణ అంశం మాత్రమే ప్రధానం కావాలని ఆయన అన్నారు. వ్యక్తిగత అభిప్రాయాలను పక్కన పెట్టి తెలంగాణవాదులు ముందుకు రావాలని ఆయన పిలుపునిచ్చారు. తెలంగాణ భూముల అమ్మకాలను ప్రతఘటిస్తామని, ఇందుకు ఇతర పార్టీలవారిని కూడగడతామని ఆయన చెప్పారు. తెలంగాణకు చెందిన 99 శాతం భూములను అమ్ముతున్నారని ఆయన విమర్శించారు.