తుపాకుల నీడలో వైయస్ పాలన: కెసిఆర్

కరీంనగర్: తుపాకుల నీడలో ముఖ్యమంత్రి డాక్టర్ వైయస్ రాజశేఖర రెడ్డి రైతులను బెదిరిస్తూ రాష్ట్రాన్ని పాలిస్తున్నారని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు వ్యాఖ్యానించారు. నిజామాబాద్ జిల్లా ఆర్మూరులో రైతులపై పోలీసులు కాల్పులు జరపడం దుర్మార్గమని ఆయన అన్నారు. ప్రాధమికోన్నత పాఠశాలల విలీనాన్ని వ్యతిరేకిస్తూ తెలంగాణ జిల్లాల కలెక్టర్ కార్యాలయాల ముందు తెరాస సోమవారం ధర్నా కార్యక్రమాలు చేపట్టింది. ఇందులో భాగంగా కరీంనగర్ జిల్లా కలెక్టర్ కార్యాలయం వద్ద జరిగిన ధర్నాలో కెసిఆర్ పాల్గొన్నారు.

పాఠశాలల విలీనాన్ని ఆయన తీవ్రంగా వ్యతిరేకించారు. ఇందుకు సంబంధించిన 76 నెంబర్ జీవోను వెంటనే ఉపసంహరించుకోవాలని ఆయన డిమాండ్ చేశారు. విద్యా నిపుణులతో చర్చించకుండా ఈ జీవోను జారీ చేయడం అన్యాయమని ఆయన అన్నారు. విద్యారంగాన్ని కూడా ప్రభుత్వం నాశనం చేస్తోందని ఆయన విమర్శించారు.