మద్యం టెండర్లపై ధర్నా: రోజా అరెస్టు

హైదరాబాద్: మద్యం టెండర్ల కేంద్రాల వద్ద రాష్ట్రవ్యాప్తంగా తెలుగు మహిళ, ఇతర మహిళా సంఘాల కార్యకర్తలు సోమవారం ధర్నాలు చేశారు. ధర్నాలు చేసిన మహిళలను పోలీసులు అరెస్టు చేశారు. హైదరాబాదులోని ఎగ్జిబిషన్ గ్రౌండ్స్ లో ఏర్పాటైన మద్యం టెండర్ల కేంద్రం వద్ద తెలుగు మహిళ రోజా ఆధ్వర్యంలో తెలుగు మహిళ కార్యకర్తలు ధర్నా చేశారు. రోజాతో పాటు పలువురిని పోలీసులు అరెస్టు చేశారు. ప్రగతిశీల మహిళా సంఘం అధ్యక్షురాలు వి. సంధ్య కూడా ధర్నాలో పాల్గొన్నారు. రాష్ట్రాన్ని మద్యాంధ్రప్రదేశ్ గా మారుస్తున్నారని రోజా విమర్శించారు.

మద్యం అమ్మకాల ద్వారా 3 వేల కోట్ల రూపాయల ఆదాయం ప్రభుత్వానికి వచ్చేదని, ఆ ఆదాయాన్ని ప్రభుత్వం 12 వేల కోట్ల రూపాయలకు పెంచుకుందని ఆమె అన్నారు. గుంటూరులో లోకసత్తా ఆధ్వర్యంలో ధర్నా జరిగింది. కాంట్రాక్టర్లకు గులాబీలు ఇస్తూ లోకసత్తా కార్యకర్తలు తమ నిరసన వ్యక్తం చేశారు. రాష్ట్రవ్యాప్తంగా మద్యం టెండర్ల కేంద్రాల వద్ద ఉద్రిక్తత నెలకొంది. విశాఖపట్నంలో ఒక మద్యం దుకాణం కోటీ 70 లక్షల రూపాయలు పలికింది.