ఎర్రజొన్న రైతులను ఆదుకుంటాం: షబ్బీర్

హైదరాబాద్: నిజామాబాద్ జిల్లాలోని ఆర్మూర్ ఎర్రజొన్న రైతులను అన్ని విధాలా ఆదుకుంటామని ముఖ్యమంత్రి డాక్టర్ వైయస్ రాజశేఖర రెడ్డి హామీ ఇచ్చినట్లు ఇంధనశాఖ మంత్రి షబ్బీర్ అలీ చెప్పారు. నిజమాబాద్ జిల్లా శాసనసభ్యులు సోమవారం ముఖ్యమంత్రిని కలిశారు. ఎర్రజొన్నలను కిలోకు 12 రూపాయల చొప్పున ఎపి సీడ్స్ ద్వారా కొనుగోలు చేయిస్తామని షబ్బీర్ అలీ మీడియా ప్రతినిధులతో చెప్పారు. రైతులకు పాత బకాయిలను కూడా ఇప్పిస్తామని ఆయన హామీ ఇచ్చారు.

సంయమనం పాటించాలని ఆయన రైతులను కోరారు. కొందరు వ్యాపారవేత్తలు చెల్లని చెక్కులు ఇచ్చినందున సమస్య ఉత్పన్నమైందని ఆయన చెప్పారు. సమస్యను రైతలు తనకు ముందు చెప్పలేదని, చెప్పి ఉంటే పరిస్థితి ఇంత దాకా వచ్చేది కాదని స్థానిక శాసనసభ్యుడు ఎస్. సంతోష్ రెడ్డి చెప్పారు. రైతులు వ్యాపారవేత్తలు మహిపాల్ రెడ్డి, ఆనందరెడ్డిల ఇళ్లను దగ్ధం చేశారు. ఫైర్ ఇంజన్లు సకాలంలో రాకపోవడంతో ఇళ్లు తగలబడ్డాయి.