ఎట్టిపరిస్థితుల్లోను పార్టీని విడిచి పెట్టను:దేవేందర్ గౌడ్

ఎట్టిపరిస్థితుల్లోను పార్టీని విడిచి పెట్టేది లేదంటున్నారు టిడిపి సీనియర్ నేత దేవేందర్ గౌడ్. పార్టీలో కొనసాగుతూనే తెలంగాణ వాదాన్ని బలంగా వినిపించి, పార్టీ అధిష్టానాన్ని ఒప్పించే ప్రయత్నం చేస్తానని సన్నిహితులతో చెప్పినట్టు సమాచారం. పార్టీలో తెలంగాణ వాదుల అభిప్రాయాలు గౌరవించేందుకు వారి తరపున మాట్లాడుతున్నట్టు దేవేందర్‌గౌడ్‌ చెబుతున్నారు. టిడిపి తెలంగాణ కోర్‌ కమిటీ మొదటి సమావేశం ప్రత్యేక వాదులను అసంతృప్తికి గురిచేసిందని పార్టీలో కొందరు అభిప్రాయపడుతున్నారు. విజయనగరం జిల్లా దేవుపల్లిలో పార్టీ అధ్యక్షుడు చంద్రబాబు నాయుడు అధ్యక్షతన జరిగిన సమావేశంలో కోర్‌ కమిటీలోని ఐదుగురు సభ్యులు సమావేశమయ్యారు. అయితే ఈ సమావేశంలో సభ్యుల మధ్య భిన్నాభిప్రాయాలు వ్యక్తం కావడంతో తెలంగాణ వాదాన్ని బలంగా వినిపిస్తున్న దేవేందర్‌ గౌడ్‌ కాస్త అసంతృప్తికి గురయ్యారని తెలుస్తోంది.

ఈ పరిణామంతో ఆయన ఎటువంటి నిర్ణయం తీసుకుంటారోనని పార్టీ వర్గాలు ఉత్కంఠగా ఎదురుచూస్తున్నాయి. ఈ నేపథ్యంలోనే దేవేందర్ గౌడ్‌ తన ఇంటివద్ద కొందరు సీనియర్ నేతలతో సమావేశమయ్యారు. ఈ బేఠీ వివరాలను బయటకు పొక్కకుండా గోప్యంగా ఉంచారు. మీడియాతో మాట్లాడేందుకు ఇష్టపడని దేవేందర్‌ పోన్‌ ద్వారా సీనియర్లతో మంతనాలు జరిపినట్లు సమాచారం. దాంతోపాటు మరికొందరు నేతలు ఆయన్ను రహస్యంగా కలుసుకున్నట్లకూడా సమాచారం. తెలంగాణ వాదాన్ని బలంగా వినిపిస్తూ పార్టీలోనే కొనసాగాలని ఆయన నిర్ణయించుకున్నట్లు తెలుస్తోంది.ప్రత్యేకవాదంపై అధిష్టానాన్ని ఒప్పించగలననే నమ్మకంతో దేవేందర్‌ గౌడ్ ఉన్నట్లు సమాచారం.