గద్దర్ కు భద్రత: జానారెడ్డి హామీ

హైదరాబాద్: విచారణ జరిపించి ప్రజా వాగ్గేయకారుడు గద్దర్ కు తగిన భద్రత కల్పిస్తామని రాష్ట్ర హోం మంత్రి కె. జానారెడ్డి తెలంగాణ రాష్ట్ర సమితి (తెరాస) శాసనసభ్యులకు హామీ ఇచ్చారు. నాయని నర్సింహారెడ్డి, ఈటెల రాజేందర్ తదితర తెరాస శాసనసభ్యులు బుధవారం జానారెడ్డిని కలిసి గద్దర్ కు వచ్చిన బెదిరింపు లేఖల గురించి ఫిర్యాదు చేశారు. గద్దర్ కు తగిన భద్రత కల్పించాలని వారు కోరారు.

గద్దర్ తెలంగాణ ఉద్యమాన్ని చేపట్టినందుననే బెదిరింపు లేఖలు వచ్చాయని, గద్దర్ కు వ్యతిరేకంగా కుట్ర చేస్తున్నారని ఈటెల రాజేందర్ జానారెడ్డిని కలిసిన అనంతరం మీడియా ప్రతినిధులతో అన్నారు. గద్దర్ ను బెదిరిస్తూ తనకు, తమ పార్టీ శాసనసభ్యుడు హరీష్ రావుకు కూడా లేఖలు వచ్చాయని, హోంమంత్రికి ఆ లేఖలను కూడా సమర్పించామని ఆయన చెప్పారు.