తిరుగుబాటు ఎంపి వ్యతిరేక ఓటు

ఛండీఘడ్: ఈ నెల 22వ తేదీన జరిగే బలపరీక్షలో నెగ్గడానికి నానా ఇక్కట్లు పడుతున్న యుపిఎ ప్రభుత్వానికి సొంత కుంపటి నుంచే వ్యతిరేకత ఎదురవుతోంది. బలపరీక్షలో నెగ్గడానికి ఒక్కో ఓటు అత్యంత కీలకమైన పరిస్థితిలో యుపిఎకు వ్యతిరేకంగా ఓటు వేస్తానని కాంగ్రెస్ తిరుగుబాటు పార్లమెంటు సభ్యుడు కుల్దీప్ బిష్నాయ్ చెప్పారు. కాంగ్రెస్ నేతృత్వంలోని యుపిఎ ప్రభుత్వ ప్రజా వ్యతిరేక విధానాలుపై తాను గొంతెత్తుతున్నానని, తాను రాజకీయ ఆత్మహత్యకు పూనుకోదలుచుకోలేదని, అందువల్ల యుపిఎకు అనుకూలంగా ఓటేసే ప్రసక్తే లేదని భివానీ ఎంపి బిష్నాయ్ అన్నారు. ఈయన హర్యానా మాజీ ముఖ్యమంత్రి భజన్ లాల్ చిన్న కుమారుడు.

బిష్నాయ్ కాంగ్రెస్ నుంచి సస్పెండ్ అయ్యారు. అణు ఒప్పందంపై పది అభ్యంతరాలతో ఆయన ఇటీవల ప్రధాని డాక్టర్ మన్మోహన్ సింగ్ కు లేఖ రాశారు. తాను లోక్ సభ సభ్యత్వానికి రాజీనామా చేస్తూ స్పీకర్ కు చాలా కాలం క్రితమే లేఖ ఇచ్చానని, అయితే తన రాజీనామాను ఆమోదించలేదని ఆయన చెప్పారు. తనను ఏ సమయంలోనైనా కాంగ్రెస్ అనర్హుడిగా ప్రకటించవచ్చునని ఆయన ఆందోళన వ్యక్తం చేశారు. బిష్నాయ్ హర్యానా జనహిత్ కాంగ్రెస్ అనే పార్టీని స్థాపించారు.