సోమనాధ్ పై విద్యాసాగర్ మండిపాటు

కరీంనగర్: స్పీకర్ పదవికి రాజీనామా చేయడానికి నిరాకరిస్తున్న సోమనాధ్ ఛటర్జీపై భారతీయ జనతా పార్టీ (బిజెపి) సీనియర్ నాయకుడు సిహెచ్. విద్యాసాగరరావు తీవ్రంగా ధ్వజమెత్తారు. బిజెపితో కలిసి ప్రభుత్వానికి వ్యతిరేకంగా ఓటేయడాన్ని సోమనాధ్ నిరాకరిస్తుండడాన్ని ఆయన బుధవారం మీడియా ప్రతినిధుల సమావేశంలో తప్పు పట్టారు. గతాన్ని సోమనాధ్ ఛటర్జీ గుర్తు చేసుకోవాలని ఆయన సూచించారు.

యుపిఎకు వామపక్షాలు మద్దతిచ్చిన సమయాన్ని ఇప్పుడు మద్దతు ఉపసంహరించుకున్న విషయాన్ని సోమనాధ్ పరిగణనలోకి తీసుకోవాలని ఆయన అన్నారు. స్పీకర్ పదవికి రాజీనామా చేయాలని ఆయన సోమనాధ్ ను డిమాండ్ చేశారు. యుపిఎ ప్రభుత్వానికి వ్యతిరేకంగా ఓటు చేయడానికి అన్ని పార్టీలు ముందుకు రావాలని ఆయన కోరారు. యుపిఎ ప్రభుత్వానికి వ్యతిరేకంగా ఓటు చేయాలని తెలంగాణ రాష్ట్ర సమితి (తెరాస) తీసుకున్న నిర్ణయాన్ని ఆయన అభినందించారు.