తిరుపతి నుంచి చిరు పోటీ

హైదరాబాద్: వచ్చే శాసనసభ ఎన్నికల్లో మెగాస్టార్ చిరంజీవి తిరుపతి నుంచి పోటీ చేయవచ్చునని ప్రచారం సాగుతోంది. వచ్చే ఎన్నికల్లో కాంగ్రెస్ అభ్యర్థిగా ప్రస్తుత తిరుమల తిరుపతి దేవస్థానం (టిటిడి) చైర్మన్, ముఖ్యమంత్రి డాక్టర్ వైయస్ రాజశేఖర రెడ్డికి అత్యంత సన్నిహితుడు బి. కరుణాకర్ రెడ్డి పోటీ చేసే అవకాశాలున్నాయి. చివరి నిమిషంలో గత ఎన్నికల్లో కరుణాకర్ రెడ్డికి టికెట్ చేజారింది. ప్రస్తుత శాసనసభ్యుడు వెంకటరమణ ఈసారి ఈ సీటును కరుణాకర్ రెడ్డికి వదలాలని అనుకుంటున్నట్లు సమాచారం.

టిటిడి చైర్మనుగా కరుణాకర్ రెడ్డి గత రెండేళ్లలో స్థానికుల అభిమానాన్ని చూరగొన్నారు. తిరుపతి కాంగ్రెసుకు బలమైన నియోజకవర్గం. అయితే ఈ నగరంలో చిరంజీవి వర్గానికి చెందినవారు పెద్ద సంఖ్యలో ఉన్నారు. చిరంజీవి ఈ సీటు నుంచి పోటీ చేస్తే స్థానికతకు, కమ్యూనిటీకి మధ్య పోటీలాగా ఉండవచ్చునని భావిస్తున్నారు.