బాబువి పిచ్చి వ్యాఖ్యలు: వైయస్

హైదరాబాద్: తెలుగుదేశం పార్టీ అధ్యక్షుడు నారా చంద్రబాబునాయుడు చేస్తున్న విమర్శలను పట్టించుకోబోమని, ప్రజలు కూడా చంద్రబాబు మాటలను పట్టించుకోవడం లేదని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. 45 రూపాయలకు కిలో పామాయిల్ నూనెను అందించే కార్యక్రమాన్ని సోమవారం సచివాయంలో కేంద్ర మంత్రి శరద్ పవార్ ప్రారంభించారు. ఈ సందర్భంగా ముఖ్యమంత్రి మీడియా ప్రతినిధుల సమావేశంలో మాట్లాడారు. రెండు రూపాయలకు కిలో బియ్యం పథకం కింద ప్రభుత్వం పశువులు కూడా తిననటువంటి బియ్యాన్ని ఇస్తోందని చంద్రబాబు చేసిన వ్యాఖ్యపై ఆయన తీవ్రంగా ధ్వజమెత్తారు. నాణ్యమైన బియ్యాన్ని, కందిపప్పును, పామాయిల్ నూనెను అందిస్తుంటే చంద్రబాబు విమర్శలు చేస్తున్నారని, తొమ్మిదేళ్లు ముఖ్యమంత్రిగా పని చేసిన వ్యక్తి ఈ విధమైన విమర్శలు చేయడం సరి కాదని ఆయన అన్నారు.

అధికారం పోయేసరికి చంద్రబాబు పిచ్చిపట్టిన వాడిలా మాట్లాడుతున్నారని ఆయన వ్యాఖ్యానించారు. చంద్రబాబు ఆ విధమైన వ్యాఖ్య చేయడమంత దారుణం మరోటి లేదని ఆయన అన్నారు. చంద్రబాబు దివాళాకోరు తనానికి ఆ వ్యాఖ్యలు నిదర్శనమని, చంద్రబాబుకు కళ్లు ఏ విధంగా కనిపిస్తున్నాయో తెలియడం లేదని ఆయన అన్నారు. తాము కిలోకు 9 రూపాయల సబ్సిడీతో పామాయిల్ నూనెను అందిస్తున్నామని ఆయన చెప్పారు. ఎంత ఖర్చయినా భరించి ప్రజలకు నాణ్యమైన నిత్యావసర సరుకులు అందిస్తామని ఆయన చెప్పారు. పది, 12 లక్షల మందికి తెల్లరేషన్ కార్డులు ఇస్తామని ఆయన చెప్పారు.