రాజీనామాకు ముషార్రఫ్ రెడీ

ఇస్లామాబాద్: ఎట్టకేలకు పాకిస్తాన్ అధ్యక్షుడు పర్వేజ్ ముషార్రఫ్ పదవినుంచి దిగిపోవాలని నిర్ణయించుకున్నారు. దేశ స్వాతంత్ర్య దినోత్సవం ఆగస్టు 14వ తేదీ తర్వాత తన పదవికి రాజీనామా చేయాలని ముషార్రఫ్ నిర్ణయించుకున్నట్లు వక్త్ అనే పత్రిక రాసింది. సురక్షితంగా ముషార్రఫ్ బయటపడాలనుకుంటున్నట్లు, అందుకే రాజీనామాకు సిద్ధపడుతున్నట్లు విశ్వసనీయ వర్గాలను ఉటంకిస్తూ వక్త్ ఆ వార్త రాసింది.

తన రాజీనామాను లాంఛనంగా ప్రకటించడానికి ముందు జాతినుద్దేశించి ప్రసంగించడానికి అవకాశం ఇవ్వాలని ముషార్రఫ్ డిమాండ్ చేసే అవకాశం ఉంది. వచ్చే వారంలో ముషార్రఫ్ పై అభిశంసన తీర్మానాన్ని పార్లమెంటులో ప్రతిపాదించనున్నట్లు సంకీర్ణ ప్రభుత్వం చెప్పింది. ముషార్రఫ్ పార్లమెంటు విశ్వాసం పొందడానికి సిద్ధపడాలని నాలుగు ప్రొవిన్షియల్ అసెంబ్లీల్లో రెండు తీర్మానం చేశాయి. నాలుగు అసెంబ్లీలు కూడా తీర్మానం చేయడం పూర్తయితే ముషార్రఫ్ పై అభిశంసన తీర్మానాన్ని పార్లమెంటులో ప్రతిపాదిస్తారు.