బిసి కోటాపై అసెంబ్లీ తీర్మానం: వైయస్

హైదరాబాద్: వెనకబడిన తరగతులకు (బిసిలకు) చట్టసభల్లో 33 శాతం రిజర్వేషన్లు కల్పించాలని కేంద్ర ప్రభుత్వాన్ని కోరుతూ శాసనసభలో తీర్మానం చేయనున్నట్లు ముఖ్యమంత్రి డాక్టర్ వైయస్ రాజశేఖర రెడ్డి చెప్పారు. ఈ వర్షాకాలం శాసనసభ సమావేశాల్లోనే తీర్మానం చేస్తామని ఆయన చెప్పారు. కొత్తగా బిసి జాబితాలో చేర్చిన నాలుగు కులాల ప్రతినిధులు గురువారం ముఖ్యమంత్రిని కలిశారు. ఈ సందర్భంగా ముఖ్యమంత్రి ఆ విషయం చెప్పారు.

మహిళలకు నియోజకవర్గ స్థాయిలో వసతి గృహాలు ఏర్పాటు చేస్తున్నట్లు ఆయన తెలిపారు. కొన్ని కళాశాలలు బిసిల నుంచి బలవంతంగా ఫీజులు వసూలు చేస్తున్నట్లు వార్తలు వస్తున్నాయని, బిసిల ఉపకార వేతనాలను త్వరలో విడుదల చేస్తామని, కళాశాలలు బిసి విద్యార్థుల నుంచి ఫీజులు వసూలు చేయకూడదని ఆయన అన్నారు.