నేడు ముషార్రఫ్ రాజీనామా

ఇస్లామాబాద్: పాకిస్తాన్ అధ్యక్షుడు పర్వేజ్ ముషార్రఫ్ సోమవారం గద్దె దిగిపోయే అవకాశం ఉంది. సంకీర్ణ ప్రభుత్వం అభిశంసన తీర్మానం ప్రతిపాదించడానికి సిద్ధపడుతుండంతో ఆయన రాజీనామా చేయనున్నట్లు ప్రచారం జరుగుతోంది. సోమవారం సాయంత్రం జాతినుద్దేశించి ప్రసంగించిన అనంతరం ఆయన రాజీనామా చేసి సౌదీకి వెళ్లిపోయే అవకాశం ఉంది. ముషార్రఫ్ రాజీనామా చేయడానికి అంగీకరించినట్లు ప్రభుత్వ అధికార ప్రతినిధి చెప్పారు. అయితే ముషార్రఫ్ అధికార ప్రతినిధి మాత్రం దాన్ని ఖండిస్తున్నారు. అయితే ఒంటి గంటన్నరకు ముషార్రఫ్ జాతినుద్దేశించి ప్రసంగిస్తారని ఆ ప్రతినిధి చెప్పారు.

సోమవారం మధ్యాహ్నం ఒంటిగంటన్నరకు జాతినుద్దేశించి చేసే ప్రసంగంలో కొన్ని ప్రధానమైన ప్రకటనలు చేసే అవకాశం ఉంది. రాజ్యాంగ ఉల్లంఘనలకు పాల్పడినందుకు, దుష్ప్రవర్తనకు ప్రభుత్వం ముషార్రఫ్ పై అభిశంసన తీర్మానం ప్రతిపాదించాలని నిర్ణయించింది. ముషార్రఫ్ రాజీనామాకు దౌత్య, రాజకీయ, ఆర్థిక కారణాలు పనిచేస్తున్నాయి.