హైదరాబాద్ పేలుళ్లకు ఏడాది

హైదరాబాద్: హైదరాబాదులో జంట పేలుళ్లు సంభవించి సోమవారానికి ఏడాది అవుతోంది. అయితే ఈ కేసులో పోలీసులు ఏ విధమైన ప్రగతీ సాధించలేదు. హైదరాబాదులోని గోకుల్ చాట్, లుంబినీ పార్కుల్లో పేలుళ్లు సంభవించి పలువురు మరణించారు. ఈ కేసులో ప్రభుత్వం నిందితుల ఊహాచిత్రాలను విడుదల చేసింది. అయితే అవన్నీ ఉత్తివేనని తేలింది. ఈ కేసులో బిలాల్ అలియాస్ షాహిద్ ప్రధాన నిందితుడని పోలీసులు అనుమానిస్తూ వచ్చారు. అయితే అతను పాకిస్తాన్ లో జరిగిన కాల్పుల్లో మరణించినట్లు వార్తలు వచ్చాయి.

ఇదిలా ఉంటే, అహ్మదాబాద్ బాంబు పేలుళ్ల నిందితుడు అబూ బషీర్ పాత్ర ఈ పేలుళ్లలో ఉండవచ్చునని అనుమానిస్తున్నారు. బషీర్ హైదరాబాదులోనే చదువుకున్నట్లు, ఇక్కడి మదర్సాలో టీచరుగా పనిచేసినట్లు వార్తలు రావడంతో హైదరాబాద్ పేలుళ్లలో అతని పాత్ర ముందుకు వచ్చింది. హైదరాబాదు బాంబు పేలుళ్లలో పోలీసులు 98 మందిని అదుపులోకి తీసుకుని విచారించారు. వీరిలో 26 మందిని పేలుళ్లతో సంబంధం లేదని విడిచిపెట్టారు. మిగతా వాళ్లలో కొంత మంది బెయిల్ పై విడుదలయ్యారు. దేశంలో ఎక్కడ పేలుళ్లు సంభవించినా హైదరాబాద్ ప్రధానంగా వార్తల్లోకి వస్తోంది. ఇతర రాష్ట్రాల పోలీసులు హైదరాబాదు వచ్చి దర్యాప్తు చేస్తున్నారు. అహ్మదాబాద్ పేలుళ్లు సంభవించిన 20 రోజుల్లో అక్కడి పోలీసులు బషీర్ ను అరెస్టు చేశారు. కానీ హైదరాబాద్ పేలుళ్ల విషయంలో మాత్రం ఇక్కడి పోలీసుల దర్యాప్తు ముందుకు సాగడం లేదు. రాజకీయ జోక్యం కూడా దీనికి ప్రధాన కారణమనే విమర్శలు వినిపిస్తున్నాయి.