చిరు వేదిక వద్ద 'ఠాగూర్' ప్రదర్శన

తిరుపతి: తిరుపతిలోని చిరంజీవి సభా వేదిక వద్ద అభిమానుల కోసం ఠాగూర్ సినిమా ప్రదర్శనను ఏర్పాటు చేశారు. చిరంజీవి బహిరంగసభ సాయంత్రం నాలుగు గంటలకు ప్రారంభమవుతుంది. అయితే వీలైనంత ముందుగా సభా వేదిక వద్దకు చేరుకోవాలని నిర్వాహకులు విజ్ఞప్తి చేశారు. దీంతో మధ్యాహ్నానికే భారీ సంఖ్యలో అభిమానులు సభావేదిక వద్దకు చేరుకున్నారు. ఇక్కడ ఎండ విపరీతంగా ఉంది. సభావేదిక వద్ద నిర్వాహకులు 25 లక్షల మంచినీటి ప్యాకెట్లు సిద్ధం చేశారు. 8 అంబులెన్సులు సిద్ధంగా ఉంచారు. 20 వైద్యశిబిరాలు ఏర్పాటుచేశారు.

గంటల తరబడి కూర్చుని బోరు కొట్టకుండా సభా వేదిక వద్ద ఏర్పాటు చేసిన స్క్రీన్‌పై ఠాగూర్‌ సినిమా ప్రదర్శిస్తున్నారు. చిరు సినిమాల్లో రాజకీయాలపై ఆయన మాట్లాడిన మాటల క్లిప్పింగులు ప్రదర్శిస్తున్నారు. చిరు వచ్చేముందు ఆయన జీవితంలోని ముఖ్య మలుపులతో డాక్యుమెంటరీని కూడా ప్రదర్శిస్తారు. తిరుపతి చేరుకున్న చిరంజీవి టి.సుబ్బిరామిరెడ్డి అతిథిగృహంలో బస చేశారు. నాలుగున్నర ప్రాంతంలో ఆయన తిరుపతి సభావేదిక చేరుకునే అవకాశం ఉంది. చిరంజీవి నటించిన స్టాలిన్ సినిమాను కూడా ప్రదర్శించారు. సభా ప్రాంగణంలో డిజిటల్ స్క్రీన్ పై ఈ సినిమాను ప్రదర్శించారు.