బలరాంను ఎదుర్కోలేకనే...: బాబు

హైదరాబాద్: ప్రకాశం జిల్లాలో రాజకీయంగా ఎదుర్కోలేకనే తమ పార్టీ శాసనసభ్యుడు కరణం బలరాంను ఆరు నెలల పాటు సస్పెండ్ చేశారని తెలుగుదేశం పార్టీ అధ్యక్షుడు నారా చంద్రబాబునాయుడు విమర్శించారు. ఏ విధమైన విచారణ లేకుండా కరణం బలరాంను సస్పెండ్ చేశారని ఆయన మీడియా ప్రతినిధులతో అన్నారు. చట్టవ్యతిరేకంగా కరణం బలరాంపై సభా హక్కుల ఉల్లంఘన కమిటీ నివేదిక ఇచ్చారని ఆయన అన్నారు. తన సస్పెన్షన్ నిరసనగా శాసనసభ ఆవరణలోని గాంధీ విగ్రహం వద్ద దీక్షకు దిగిన కరణం బలరాంకు మద్దతుగా తెలుగుదేశం, సిపిఎం సభ్యులు ఆయన వద్ద కూర్చున్నారు. కరణం బలరాం సస్పెన్షన్ ఏకపక్షంగా జరిగిందని ఆయన అన్నారు.

కరణం బలరాంపై విచారణ జరిపిన సభా హక్కుల ఉల్లంఘన కమిటీకి చైర్మన్ ప్రకాశం జిల్లాకు చెందిన శాసనసభ్యుడు కావడాన్ని ఇక్కడ గుర్తించాలని ఆయన అన్నారు. కరణం బలరాంపై తప్పుడు ప్రచారం చేస్తున్నారని ఆయన అన్నారు. స్పీకర్ పై కరణం బలరాం చేసిన వ్యాఖ్యలకు సంబంధించి ఇచ్చిన సిడి నకిలీదని ఆయన అన్నారు. కరణం బలరాం ఇచ్చిన సిడిని వారు పరిగణనలోకి తీసుకోలేదని, ఈ రెండు సీడీల్లో తేడా ఉందని ఆయన అన్నారు. కరణం బలరాం స్పీకర్ పై వ్యాఖ్యలు చేశారని చెబుతున్న వార్తను ప్రసారం చేసిన వారిని విచారణకు పిలువలేదని ఆయన చెప్పారు.