చిరుపై ఇప్పుడే మాట్లాడను: కెసిఆర్

హైదరాబాద్: తెలంగాణపై తుది నిర్ణయం తీసుకున్న తర్వాతనే చిరంజీవి ప్రజారాజ్యం పార్టీపై మాట్లాడుతామని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు అన్నారు. తెలంగాణపై తాను చేసే ప్రకటన తుది నిర్ణయానికి సంబంధించింది కాదని, సమిష్టిగా చర్చించి నిర్ణయం తీసుకుంటామని చిరంజీవి చెప్పారని, అందువల్ల తాము ఇప్పుడే చిరంజీవి ప్రకటనపై మాట్లాడబోమని ఆయన బుధవారం మీడియా ప్రతినిధుల సమావేశంలో అన్నారు. తెలంగాణపై చిరంజీవి ప్రకటనలో మరింత స్పష్టత కోసం వేచిచూద్దామని ఆయన అన్నారు. చిరంజీవి భవిష్యత్తులో రాజకీయ శక్తిగా ఎదుగుతారని ఆయన అన్నారు. టి. దేవేందర్ గౌడ్ నవ తెలంగాణ ప్రజా పార్టీ గురించి విలేకరులు ప్రస్తావించగా తెలంగాణ కోసం ఎవరు పని చేసినా స్వాగతిస్తామని ఆయన అన్నారు. తెలంగాణ కోసం ఎవరి పంథాలో వారు పని చేస్తున్నారని, పని చేయనివ్వండని ఆయన అన్నారు.

తెలంగాణ కోసం పోరాడుతున్న అతి పెద్ద ఉద్యమ సంస్థగా, తెలంగాణ అంశాన్ని జాతీయ స్థాయిలో చర్చకు తీసుకువచ్చిన పార్టీగా తమ పార్టీ తెలంగాణవాదులందరినీ ఏకం చేసే కృషి చేస్తుందని ఆయన చెప్పారు. తెలంగాణవాదులందరూ ఏకమవుతారని ఆయన ఆశాభావం వ్యక్తం చేశారు. స్పీకర్ పై తెలుగుదేశం పార్టీ ఒకందుకు అవిశ్వాస తీర్మానం ప్రతిపాదిస్తోందని, ఫిరాయింపుల నిరోధక చట్టాన్ని అమలు చేయడంలో స్పీకర్ విఫలమయ్యారు కాబట్టి తాము ఆ అవిశ్వాస తీర్మానానికి మద్దతు తెలుపుతున్నామని ఆయన వివరణ ఇచ్చారు.