నా కొడుకు వస్తున్నాడు: నాగ్

హైదరాబాద్: సినిమాలకు తన కుమారుడు నాగచైతన్యను పరిచయం చేయడం ఈ జన్మదినం సందర్భంగా తనకు సంతోషకరమైన విషయమని ప్రముఖ నటుడు నాగార్జున అన్నారు. నాగార్జున శుక్రవారంనాడు తన 49వ జన్మదినాన్ని తన అభిమానుల మధ్య కేక్ కట్ చేసి జరుపుకున్నారు. జన్మదినం జరుపుకోవడం తనకు విషాదంగా ఉంటుందని, తన ఆయుస్సు తరిగిపోతున్నదనే బాధ కలుగుతుందని ఆయన అన్నారు.

అయితే ఈ జన్మదినం సందర్భంగా తమ కుమారుడు నాగచైతన్యను సినిమాలకు పరిచయం చేస్తుండడం వల్ల ఆనందం కలుగుతోందని, వచ్చే వేసవి నాటికి నాగచైతన్య సినిమా నిర్మాణం పూర్తవుతుందని ఆయన చెప్పారు. ఈ జన్మదిన వేడుకల్లో నాగార్జున తండ్రి, ప్రముఖ నటుడు అక్కినేని నాగేశ్వరరావు కూడా పాల్గొన్నారు.