19న బాలకృష్ణ రాజకీయ సభ

హైదరాబాద్: తెలుగుదేశం పార్టీ కోసం పూర్తి స్థాయిలో రంగంలోకి దిగేందుకు బాలకృష్ణతో పాటు జూనియర్ ఎన్టీఆర్, కళ్యాణ్ రామ్ సిద్ధపడ్డారు. తమ ప్రచార కార్యక్రమ రూపకల్పనపై బాలకృష్ణ తెలుగుదేశం పార్టీ అధ్యక్షుడు నారా చంద్రబాబునాయుడితో ఆదివారం సాయంత్రం విస్తృతంగా చర్చలు జరిపారు. రాయలసీమలో బాలకృష్ణ, కోస్తా ప్రాంతంలో జూనియర్ ఎన్టీఆర్, కళ్యాణ్ రామ్ పర్యటిస్తారు. తెలంగాణలో హరికృష్ణ పర్యటిస్తారు. తెలంగాణలో హరికృష్ణతో పాటు మిగతా ముగ్గురు కూడా పర్యటిస్తారు. చిరంజీవి ప్రజారాజ్యం పార్టీని స్థాపించి విస్తృతంగా రాష్ట్ర పర్యటనకు బయలుదేరనున్న నేపథ్యంలో ఈ నలుగురు నందమూరి వారసులు తెలుగుదేశం పార్టీ కోసం రంగంలోకి దిగుతున్నారు. నెలలోపల వీరు రాజకీయంలోకి పూర్తిస్థాయిలో అడుగు పెట్టనున్నట్లు సమాచరాం. ఈ నెల 19వ తేదీన మహబూబ్ నగర్ జిల్లా కొల్లాపూర్ లో ఎన్టీఆర్ విగ్రహాన్ని ఆవిష్కరించడం ద్వారా బాలకృష్ణ తన పర్యటనను మొదలు పెడతారని వార్తలు వస్తున్నాయి.

ఇక, సినీ పరిశ్రమ నుంచి తమకు మద్దతు కోల్పోకుండా చంద్రబాబు ఇప్పటికే పలువురితో మాట్లాడినట్లు సమచారం. సినీప్రముఖులు అశ్వనీదత్, కె. రాఘవేంద్ర రావు, మురళీమోహన్ తదితరులు ఎప్పటికప్పుడు చంద్రబాబుతో మాట్లాడుతున్నట్లు వార్తలు వస్తున్నాయి. పరచూరి గోపాలకృష్ణ కూడా శనివారంనాడు చంద్రబాబును కలిసినట్లు తెలుస్తోంది. దర్శకులు ఇవివి సత్యనారాయణ, తేజ కూడా ఆదివారంనాడు చంద్రబాబును కలిసినవారిలో ఉన్నారు. ఆదివారంనాడు కుటుంబ సమేతంగా బాలకృష్ణ చంద్రబాబు ఇంటికి వచ్చారు.