చిరంజీవి యాత్రకు మూడు ప్రత్యేక వాహనాలు

హైదరాబాద్‌: 'ప్రజారాజ్యం' అధినేత చిరంజీవి జిల్లాల పర్యటన ప్రణాళిక ఈ వారాంతంలోనే ఖరారు కానుంది. యాత్రకు మూడు రథాలు సిద్ధమవుతున్నాయి. ఈ నెల మూడో వారంలో యాత్ర ప్రారంభమయ్యే అవకాశముంది. బుధవారం సాయంత్రం నుంచి రాత్రి వరకు దీనిపై కీలక సమావేశం జరిగింది. కోర్‌ కమిటీ ముఖ్యులంతా ఇందులో పాల్గొన్నారు. చిరంజీవి భద్రత, అభిమానుల తాకిడిని ఎలా తట్టుకోవాలన్న అంశంపై ఎక్కువసేపు చర్చించినట్లు సమాచారం. తిరుపతి సభలో ఎదురైన అనుభవాలు కూడా సమావేశంలో ప్రస్తావనకు వచ్చినట్లు తెలిసింది. పర్యటన సజావుగా సాగేలా చూసేందుకు రెండ్రోజుల్లో రాష్ట్ర కమిటీని నియమించనున్నారు.

దీనికి అనుబంధంగా వివిధ రకాల ఏర్పాట్ల కోసం ఉపసంఘాలను చేయనున్నారు. ప్రచార యాత్రకు మూడు వాహనాలు సిద్ధమవుతున్నాయి. విశాలంగా ఉండే నాలుగు, రెండు వరసల రహదారులపై ప్రయాణించేందుకు వీలుగా భారీ వాహనం, పట్టణాలు, మండల కేంద్రాల్లో అంతర్గత రహదారులపై వెళ్లేందుకు వీలుగా రెండు చిన్నపాటి వాహనాలను రథాలుగా తయారుచేసే ప్రక్రియ పూర్తయినట్లు సమాచారం.