వచ్చే ఎన్నికల్లో బాలయ్య పోటీ?

హైదరాబాద్: వచ్చే ఎన్నికల్లో పోటీ చేయాలని ప్రముఖ నటుడు, స్వర్గీయ ఎన్టీ రామారావు కుమారుడు బాలకృష్ణపై ఒత్తిడి పెరుగుతోంది. అనంతపురం జిల్లా హిందూపురం నుంచి పోటీ చేయాలని ఆయనపై తెలుగుదేశం పార్టీ నాయకులు ఒత్తిడి తెస్తున్నట్లు వార్తలు వస్తున్నాయి. ఈ నియోజకవర్గం నుంచి స్వర్గీయ ఎన్టీ రామారావు పోటీ చేసి గెలిచారు. అలాగే హరికృష్ణ కూడా పోటీ చేసి గెలిచారు. ఇప్పుడు బాలకృష్ణ పోటీ చేస్తే బాగుంటుందని, దీనివల్ల రాయలసీమ మొత్తం మీద ప్రభావం పడి పార్టీ లాభపడుతుందని తెలుగుదేశం నాయకులు భావిస్తున్నారట. ఆదివారం తెలుగుదేశం పార్టీ అధ్యక్షుడు నారా చంద్రబాబుతో జరిగిన బాలకృష్ణ భేటీలో ఈ విషయంపై చర్చ జరిగినట్లు తెలుస్తోంది.

తెలుగుదేశం పార్టీ కోసం బాలయ్య పూర్తి స్థాయిలో ప్రచారానికి దిగాలని చంద్రబాబుతో జరిగిన భేటీలో ఖరారైంది. తెలుగుదేశం కోసం ఏమి చేయడానికైనా సిద్ధమేనని జూనియర్ ఎన్టీఆర్ హామీ ఇచ్చినట్లు సమాచారం. గుంటూరులో యువగర్జన సదస్సుతో బాలకృష్ణ రాజకీయ ఆరంగేట్రం చేస్తారని తెలుస్తోంది. దసరా పర్వదినం తర్వాతనే ఈ సదస్సు జరిగే అవకాశం ఉంది. బాలయ్య తెలుదేశం పార్టీ కోసం పాదయాత్రలు కూడా చేస్తారని తెలుస్తోంది.