చిరుతో అమర్ భేటీపై దాసరి ఆరా

హైదరాబాద్: ప్రజారాజ్యం పార్టీ అధినేత చిరంజీవితో సమాజ్ వాదీ పార్టీ నేత అమర్ సింగ్ భేటీపై ప్రముఖ దర్శకుడు, కేంద్ర మాజీ మంత్రి దాసరి నారాయణరావు ఆరా తీసినట్లు సమాచారం. చిరంజీవితో పొత్తు పెట్టుకున్నారా అని ఆయన అమర్ సింగ్ ను అడిగినట్లు వార్తలు వెలువడ్డాయి. తిరుగు ప్రయాణానికి ముందు అమర్ సింగ్ దాసరితో ఫోనులో మాట్లాడినట్లు చెబుతున్నారు. తాము చిరంజీవితో పొత్తు పెట్టుకోవడానికి రాలేదని, మర్యాదపూర్వకంగా కలవడానికే వచ్చామని దాసరితో ఆయన చెప్పారు.

అమర్ సింగ్ తో పాటు ఎస్పీ రాజ్యసభ సభ్యులు జయప్రద, జయాబచ్చన్ ఆదివారం సాయంత్రం చిరంజీవిని కలిశారు. చిరంజీవిని కలిసిన అనంతరం వారు దాసరి నారాయణరావును కూడా కలవాలనుకున్నారు. అయితే దాసరి నారాయణరావు మేస్త్రీ చిత్ర నిర్మాణంలో తీరిక లేకుండా ఉండడంతో వీలు కాలేదు. నెలాఖరులో మళ్లీ హైదరాబాద్ వస్తామని, అప్పుడు కలుస్తామని అమర్ సింగ్ దాసరితో చెప్పినట్లు తెలుస్తోంది. తెలుగులో దాసరి నారాయణరావు తీసిన ఒసేయ్ రాములమ్మ చిత్రం బెంగాలీ వెర్షన్ షూటింగ్ ఈ నెలాఖరులో హైదరాబాదులో జరుగుతోంది. ఈ సినిమాలో నటిస్తున్న అమర్ సింగ్, జయప్రద షూటింగ్ నిమిత్తం హైదరాబాదు రానున్నట్లు సమాచారం.