నాడు టిడిపి తెలంగాణకు అడ్డు: అద్వానీ

బెంగుళూర్: తెలుగుదేశం పార్టీ అడ్డుపడడం వల్లనే జాతీయ ప్రజాస్వామ్య కూటమి (ఎన్డీయె) ప్రభుత్వ హయాంలో తెలంగాణ రాష్ట్రాన్ని ఇవ్వలేకపోయామని బిజెపి అగ్రనేత ఎల్. కె. అద్వానీ అన్నారు. బిజెపి జాతీయ కార్యవర్గ సమావేశంలో ఆయన ముగింపు ప్రసంగం చేస్తూ తెలంగాణ అంశాన్ని ప్రస్తావించారు. కేంద్రంలో ఎన్డీయె అధికారంలో ఉన్నప్పుడు తెలుగుదేశం పార్టీ భాగస్వామిగా ఉందని, ప్రభుత్వ మనుగడ కోసం భాగస్వామ్య పార్టీ అయిన తెలుగుదేశం సూచనలను పాటించాల్సి వచ్చిందని ఆయన చెప్పారు.

తెలంగాణ ప్రజల్లో అత్యధికులు ప్రత్యేక రాష్ట్రాన్ని కోరుకుంటున్నారని, వారి డిమాండుకు అనుగుణంగా ప్రత్యేక రాష్ట్ర ఏర్పాటుకు తీర్మానం చేసిన ఘనత తమదేనని, ఎన్డీయె పొత్తు వల్ల దాన్ని అమలు చేయలేకపోయామని ఆయన అన్నారు. కొన్ని రాజకీయ పక్షాలు మాత్రమే తెలంగాణ రాష్ట్ర ఏర్పాటును వ్యతిరేకిస్తున్నాయని, తెలంగాణ ప్రజల చిరకాల కోరికను తీర్చే సమయం ఆసన్నమైందని ఆయన అన్నారు.