రాజీనామాకు శివరాజ్ పాటిల్ పై ఒత్తిడి?

న్యూఢిల్లీ: కేంద్ర హోంమంత్రి శివరాజ్ పాటిల్ రాజీనామాకు ఒత్తిడి పెరుగుతున్న సూచనలు కనిపిస్తున్నాయి. హోంమంత్రిగా శివరాజ్ పాటిల్ పనితీరుపై ఐక్య ప్రగతిశీల కూటమి (యుపిఎ) మిత్రపక్షాలు తీవ్ర అసహనం ప్రదర్సిస్తున్నట్లు వార్తలు వస్తున్నాయి. కేంద్ర నిఘా వ్యవస్థలు విఫలమయ్యాయని రాష్ట్రీయ జనతాదళ్ (ఆర్జెడి) నేత, రైల్వే మంత్రి లాలూ ప్రసాద్ యాదవ్ విమర్శించారు. ఢిల్లీ పేలుళ్ల నేపథ్యంలో శివరాజ్ పాటిల్ తీవ్ర ఇరకాటంలో పడ్డారు. అంతేకాకుండా కాంగ్రెస్ అధ్యక్షురాలు సోనియా గాంధీ పేలుళ్లపై చర్చకు ఏర్పాటు చేసిన పార్టీ సీనియర్ నాయకుల సమావేశానికి కూడా శివరాజ్ పాటిల్ హాజరు కాలేదు. ఈ సమావేశానికి సోనియా శివరాజ్ పాటిల్ ను ఆహ్వానించలేదని సమాచారం.

ఢిల్లీ పేలుళ్ల నేపథ్యంలో వామపక్షాలు హోంమంత్రి శివరాజ్ పాటిల్ పై తీవ్ర విమర్శలు చేశాయి. జాతీయ భద్రతకు సంబంధించి జవాబుదారీ హోమంత్రేనని వామపక్షాలు అన్నాయి. శివరాజ్ పాటిల్ రాజీనామాకు లాలూ ప్రసాద్ యాదవ్ కూడా డిమాండ్ చేస్తున్నట్లు తెలుస్తోంది.