కెసిఆర్ తో చర్చలకు దేవేందర్ రెడీ

హైదరాబాద్: ఐక్యత కోసం తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుతో మాట్లాడడానికి నవ తెలంగాణ ప్రజా పార్టీ (ఎన్టీపిపి) నేత టి. దేవేందర్ గౌడ్ సుముఖత వ్యక్తం చేశారు. తెలంగాణ ఉద్యమ పార్టీల్లో ఐక్యత దిశగా సాగుతున్న ప్రయత్నాల్లో భాగంగా ఆయన ఆ విధంగా అన్నారు. తాను దేవేందర్ గౌడ్ తో మాట్లాడ్తానని అంతకు తెరాస అధ్యక్షుడు కె. చంద్రశేఖర రావు చెప్పారు. దానికి సానుకూలంగా దేవేందర్ గౌడ్ ప్రతిస్పందించారు. తాను చంద్రశేఖర రావుతో మాట్లాడడానికి సిద్ధంగా ఉన్నానని తెలంగాణ ఆత్మగౌరవ యాత్రలో ఉన్న దేవేందర్ గౌడ్ సోమవారం అన్నారు.

చంద్రశేఖరరావు ఇప్పటికే తల్లి తెలంగాణ వ్యవస్థాపక నేత విజయశాంతితో మాట్లాడారు. వీరిద్దరి మధ్య ఐక్యతకు ఇప్పటికే ఒక అవగాహన కుదిరింది. దీనికి సంబంధించి త్వరలో ప్రకటన వెలువడే అవకాశం ఉంది. కాగా, తెలుగుదేశం పార్టీకి తెరాస దగ్గరవుతూ వస్తున్నది. తెలంగాణకు అనుకూలంగా తెలుగుదేశం పార్టీ నిర్ణయం తీసుకునే అవకాశం ఉండడంతో ఈ సాన్నిహత్యం పెరుగుతూ వస్తున్నది. స్పీకర్ కె.ఆర్. సురేష్ రెడ్డిపై ప్రతిపాదించిన అవిశ్వాస తీర్మానంపై చర్చ సందర్భంగా సోమవారం ఈ రెండు పార్టీలు సమన్వయంలో వ్యవహరించాయి.