రోశయ్యకు పరీక్షలు అవసరం: తలసాని

హైదరాబాద్: రాష్ట్ర ఆర్థిక మంత్రి కె. రోశయ్య వైద్య పరీక్షలు చేయించుకుంటే మంచిదని తెలుగుదేశం శాసనసభ్యుడు తలసాని శ్రీనివాస యాదవ్ వ్యాఖ్యానించారు. రోశయ్య సేవలు రాష్ట్రానికి చాలా అవసరమని, ఇప్పుడు రోశయ్య వైద్య పరీక్షలు చేయించుకుంటే మంచిదని ఆయన వ్యంగ్యంగా వ్యాఖ్యానించారు. తెలుగుదేశం పార్టీ అధ్యక్షుడు నారా చంద్రబాబునాయుడికి మతిస్థిమితం లేదని, తెలుగుదేశం పార్టీకి వచ్చే ఎన్నికల్లో ప్రతిపక్ష హోదా కూడా దక్కదని రోశయ్య బుధవారం చేసిన వ్యాఖ్యలపై తలసాని శ్రీనివాస యాదవ్ గురువారం మీడియా ప్రతినిధుల సమావేశంలో తీవ్రంగా మండిపడ్డారు.

తమ పార్టీకి ప్రతిపక్ష హోదా ఇస్తారా, లేదా ప్రజలు నిర్ణయిస్తారని, ముందు రోశయ్య చీరాలలో మళ్లీ గెలుస్తారా, లేదా అనే విషయాన్ని చూసుకోవాలని ఆయన అన్నారు. ప్రజలకు అన్నీ చేస్తే ముఖ్యమంత్రి డాక్టర్ వైయస్ రాజశేఖర రెడ్డికి అంత ప్రచారం ఎందుకని ఆయన అడిగారు. అందరి సమస్యలు తీరిస్తే శాసనసభ సమావేశాలు జరిగినంత కాలం వేలాది మంది హైదరాబాదులోని ఇందిరా పార్కు వద్ద ధర్నాలు ఎందుకు చేస్తారని ఆయన అడిగారు.