వైయస్ కు రాఘవులు హెచ్చరిక

హైదరాబాద్: నువ్వో మేమో తేల్చుకునే వరకు భూపోరాటం సాగుతుందని సిపిఎం రాష్ట్ర కార్యదర్శి బి.వి. రాఘవులు హెచ్చరించారు. పేదలకు ఇళ్ల పట్టాలు ఇవ్వాలని డిమాండ్ చేస్తూ శుక్రవారం సిపిఎం ఆధ్వర్యంలో హైదరాబాద్ మహానగర్ పాలక సంస్థ వద్ద ధర్నా జరిగింది. ఈ ధర్నా కార్యక్రమంలో పెద్ద యెత్తున ప్రజలు పాల్గొన్నారు. బడా పారిశ్రామికవేత్తలకు 27 వేల ఎకరాలు కట్టబెట్టిన ప్రభుత్వం పేదలకు 20 గజాల భూమి కూడా ఇవ్వడం లేదని ఆయన విమర్శించారు.

ముఖ్యమంత్రి డాక్టర్ వైయస్ రాజశేఖర రెడ్డి భూబకాసురల కొమ్ము కాస్తున్నారని ఆయన విమర్శించారు. ఈ ధర్నా కార్యక్రమంలో తెలుగుదేశం పార్టీ శాసనసభ్యుడు తలసాని శ్రీనివాస యాదవ్ కూడా పాల్గొన్నారు. పేదలకు ఇళ్ల స్థలాలు ఇవ్వకపోతే తామే లాక్కుంటామని ఆయన అన్నారు. కార్యాలయంలోకి చొచ్చుకుపోయేందుకు ఆందోళనకారులు ప్రయత్నించారు. పోలీసులు వారిని అడ్డుకున్నారు. దీంతో అక్కడ ఉద్రిక్తత నెలకొంది.