చిరంజీవికి ధీటుగా బాలకృష్ణ

హైదరాబాద్: తెలుగుదేశం పార్టీకి పూర్వవైభవం చేకూర్చేందుకు ప్రముఖ సినీ నటుడు బాలకృష్ణ యువగర్జన సదస్సులో పాల్గొంటారు. ఆయన పర్యటనలు అక్టోబర్ మూడో వారంలో ప్రారంభమయ్యే అవకాశాలున్నాయి. తెలుగుదేశం పార్టీ పోలిట్ బ్యూరో సోమవారం సమావేశమై ఈ విషయం చర్చించినట్లు తెలుస్తోంది. చిరంజీవి ఇమేజ్ ను ఎదుర్కోవడానికి బాలకృష్ణను రంగంలోకి దింపాలని తెలుగుదేశం పార్టీ అధ్యక్షుడు నారా చంద్రబాబు నాయుడు ఆలోచన చేసి అందుకు కార్యాచరణను రూపొందించారు.

తెలంగాణ రాష్ట్ర సమితి (తెరాస)తో పొత్తు పెట్టుకోవడానికి వీలుగా తెలంగాణ అంశాన్ని త్వరగా తేల్చాలని పోలిట్ బ్యూరో సమావేశం నిర్ణయించుకుంది. వచ్చే నెల 15వ తేదీ లోగా పార్టీ కోర్ కమిటీ తెలంగాణపై తన నివేదికను చంద్రబాబుకు సమర్పించనుంది. ఈ నెల 27, 28, 29 తేదీల సమావేశాలతో కోర్ కమిటీ సమావేశాలను ముగించాలని తెలుగుదేశం పార్టీ నిర్ణయించుకుంది. అంతే కాకుండా వారానికి మూడు రోజులు చంద్రబాబు జిల్లాల్లో పర్యటించేలా కార్యక్రమాలు ఖరారు చేయాలని కూడా తెలుగుదేశం పార్టీ పోలిట్ బ్యూరో సమావేశం నిర్ణయించింది.