మహిళా సంక్షేమ ఘనత మాదే: బాబు

హైదరాబాద్: మహిళలకు పెద్ద యెత్తున కార్యక్రమాలు చేపట్టిన పార్టీ తమదేనని తెలుగుదేశం పార్టీ అధ్యక్షుడు నారా చంద్రబాబునాయుడు అన్నారు. ఈ విషయంలో తాను ఎక్కడైనా చర్చకు సిద్ధమని ఆయన అన్నారు. తెలుగు మహిళ సదస్సులో ఆయన మంగళవారం సాయంత్రం మాట్లాడారు. మహిళల కోసం విశ్వవిద్యాలయం పెట్టిన ఘనత తమ నేత ఎన్టీఆర్ కే దక్కుతుందని ఆయన అన్నారు. ఆడపిల్లలకు తండ్రి ఆస్తిలో వాటా కల్పించిన ఘనత కూడా ఎన్టీ రామారావుకే దక్కుతుదని ఆయన అన్నారు. మీ కోసం యాత్రలో తాను ఇచ్చిన హామీల అమలుపై కమిటీ చర్చిస్తోందని, వాటి అమలుకు తగిన ప్రణాళికలు రూపొందిస్తామని, వాటిని ఎన్నికల ప్రణాళికలో చేరుస్తామని ఆయన చెప్పారు.

ఎన్నికల్లో ఎక్కువ సీట్లు ఇచ్చిన ఘనత తెలుగుదేశం పార్టీకే దక్కుతుందని తెలుగు మహిళ అధ్యక్షురాలు రోజా అన్నారు. మహిళా సమస్యలపై క్షేత్ర స్థాయి పరిశీలన జరుగుతోందని ఆమె చెప్పారు. మహిళ అభివృద్ధికి, సంక్షేమానికి ప్రత్యేక ప్రణాళికను రూపొందించనున్నట్లు ఆమె తెలిపారు. ఈ సదస్సులో నన్నపనేని రాజకుమారితో పాటు పలువురు నాయకురాళ్లు పాల్గొన్నారు.