త్వరలో పెళ్లి చేసుకుంటా: రాహుల్

అమృతసర్: తాను త్వరలో పెళ్లి చేసుకుంటానని కాంగ్రెస్ అద్యక్షురాలు సోనియా గాంధీ కుమారుడు, పార్లమెంటు సభ్యుడు రాహుల్ గాంధీ చెప్పారు. మంగళవారం రోడ్ షో సందర్భంగా వేసిన ప్రశ్నకు ఆయన ఆ సమాధానం ఇచ్చారు. అయితే తాను ఎవరిని పెళ్లి చేసుకోబోతున్నది, ఎప్పుడు చేసుకోబోతున్నది వంటి వివరాలను ఇవ్వలేదు. తాను త్వరలో పెళ్లి చేసుకుంటానని మాత్రమే 38 ఏళ్ల రాహుల్ చెప్పారు.

మేలో జరిగిన పంచాయతీ ఎన్నికల సందర్భంగా జరిగిన గొడవల్లో గాయపడినవారిని, మరణించినవారి కుటుంబ సభ్యులను ఆయన పరామర్శించారు. వారు చెప్పిన మాటలు విన్న ఆయన తాను ఢిల్లీకి వెళ్లగానే తగిన సాయం అందేలా చూస్తానని హామీ ఇచ్చారు. బిజెపి - అకాలీదళ్ ప్రభుత్వంలో తమపై అత్యాచారాలు జరుగుతున్నాయని కొంత మంది రాహుల్ గాంధీకి ఫిర్యాదు చేశారు. మద్యం మాన్పించడానికి కృషి చేస్తున్న రెడ్ క్రాస్ సొసైటీ కేంద్రాన్ని కూడా ఆయన సందర్శించారు. యువకులు పార్టీలో చేరేలా కృషి చేయాలని ఆయన కాంగ్రెస్ యువ నేతలకు పిలుపునిచ్చారు.