చిరు ప్రభావం తప్పదు: వెంకయ్య

హైదరాబాద్: రాష్ట్రంలో ప్రజారాజ్యం అధినేత చిరంజీవి ప్రభావం ఉంటుందని భారతీయ జనతా పార్టీ (బిజెపి) సీనియర్ నేత ఎం. వెంకయ్యనాయుడు అభిప్రాయపడ్డారు. అయితే ఆ ప్రభావం ఏ మేరకు ఉంటుందో ఇప్పుడే చెప్పలేమని ఆయన అన్నారు. వచ్చే ఎన్నికల్లో రాష్ట్రంలో ఏ పార్టీకి కూడా సంపూర్ణ మెజారిటీ రాదని ఆయన మంగళవారం మీడియా ప్రతినిధుల సమావేశంలో అన్నారు.

జాతీయ స్థాయిలో మూడో ప్రత్యామ్నాయం సాధ్యం కాదని ఆయన అన్నారు. ఐక్య ప్రగతిశీల కూటమి (యుపిఎ)కు తామే ప్రత్యామ్నాయమని ఆయన అన్నారు. జాతీయ పార్టీలతోనే తెలంగాణ రాష్ట్రం ఏర్పాటు సాధ్యమని ఆయన అన్నారు. ప్రాంతీయ పార్టీలు తెలంగాణ సమస్యను పరిష్కరించలేవని ఆయన అన్నారు. ఉగ్రవాదం పట్ల యుపిఎ ప్రభుత్వం మెతక వైఖరి అవలంబిస్తోందని ఆయన విమర్శించారు. తీవ్రవాదాన్ని అదుపు చేయడానికి పొటా కన్నా బలమైన చట్టం కావాలని ఆయన అన్నారు.