చిరు పార్టీలో చేరను: అశ్వనీదత్

విజయవాడ: తాను టీడీపీతోనే ఉంటానని, చిరంజీవి ప్రజారాజ్యం పార్టీలో చేరేది లేదని ప్రముఖ నిర్మాత అశ్వనీదత్ స్పష్టం చేశారు. తెలుగుదేశం పార్టీ ఆదేశిస్తే విజయవాడ లోక్ సభ స్ధానం నుంచి టీడీపీ తరపున మళ్ళీ పోటీ చేస్తానని వైజయంతీ మూవీస్‌ అధినేత అయిన అశ్వినీదత్‌ అన్నారు. విజయవాడలో ఆయన శనివారం ఉదయం కనకదుర్గ అమ్మవారిని దర్శించుకున్నారు. అనంతరం మీడియాతో మాట్లాడారు.

చిరంజీవితో ఉన్న సాన్నిహిత్యం దృష్ట్యా ప్రజారాజ్యంపార్టీలో చేరతారా అని విలేకరులు అడగగా ఆయన తాను టీడీపీలోనే ఉంటానని ఇతర ఏ పార్టీలోను చేరనని ఆయన అన్నారు. ఎన్నికల్లో పోటీచేయమని బాబు ఆదేశిస్తే చేస్తానని చెప్పారు. గత లోక్ సభ ఎన్నికల్లో అశ్వనీదత్ విజయవాడ స్ధానం నుంచి టిడిపి అభ్యర్ధిగా పోటీ చేసి లగడపాటి రాజగోపాల్ మీద ఓడిపోయారు. ఆ సమయంలో అశ్వనీదత్ కు చిరంజీవే టిడిపి టికెట్ ఇప్పించినట్టు వార్తలు వచ్చాయి. అశ్వనీదత్ కు ఓటు వేయమని చిరంజీవి పరోక్షంగా పిలుపు ఇచ్చినా అభిమానులు స్పందించకపోవడంతో దత్ ఓటమి చవిచూశారు.