గొంతు సమస్య: చిరు పర్యటన కుదింపు

విశాఖపట్నం: ప్రజాపార్టీ అధినేత చిరంజీవి ఉత్తరాంధ్ర పర్యటనను రెండు రోజుల ముందే ముగిస్తున్నట్టు ఆ పార్టీ అధికార ప్రతినిధి డాక్టర్ మిత్రా బుధవారం ఉదయం చెప్పారు. షెడ్యూలు ప్రకారం చిరంజీవి పది రోజుల పాటు ఈ ప్రాంతంలో పర్యటించవలసి ఉంది. కానీ చిరంజీవి గొంతు బొంగురు పోయినందువల్ల పర్యటనను ఎనిమిది రోజులకు కుదించినట్టు ఆయన తెలిపారు.

చిరంజీవి నేడు విశాఖపట్నంలోని మరికొన్ని ప్రాంతాల్లో పర్యటించి, నేటి రాత్రికి అనకాపల్లిలో విశ్రాంతి తీసుకుంటారు. రాష్ట్రంలో పది శాతం జనాభా కూడా లేని పెత్తందారీ కులాల వారు 90 శాతం ప్రజలను గత అరవై ఏళ్ళుగా పాలిస్తున్నారని, శాసిస్తున్నారని, అట్టడుగు వర్గాలకు అధికారం అందుబాటులోకి తేవడం ప్రజారాజ్యం ఆశయమని చిరంజీవి ప్రతి సభలో చెప్పడంతో జనం నుంచి మంచి స్పందన కనిపిస్తోంది. చిరంజీవి ఇప్పుడు సరైన మార్గంలోకి వచ్చారని, ఇదే టెంపోను కొనసాగిస్తే ఆయన ముఖ్యమంత్రి కావడం పెద్ద కష్టం కాదని రాజకీయ పరిశీలకులు అంటున్నారు.