సోనియావి ఓటు రాజకీయాలు: మాయ

లక్నో: కాంగ్రెస్, ఆ పార్టీ అధ్యక్షురాలు సోనియా గాంధీ ఓటు బ్యాంక్ రాజకీయాలు చేస్తున్నట్లు ఉత్తరప్రదేశ్ ముఖ్యమంత్రి మాయావతి ఆరోపించారు. కాంగ్రెస్ రాయబరేలి గురించి మాత్రమే కలవరం చెందుతోందని, తాను ఉత్తరప్రదేశ్ అంతటి గురించి కలవరం చెందుతున్నానని ఆమె బుధవారం మీడియా ప్రతినిధుల సమావేశలో అన్నారు. తమ ప్రభుత్వం అభివృద్ధికి వ్యతిరేకంగా పని చేస్తోందనే సోనియా గాంధీ విమర్శలను ఆమె ఖండించారు. గంగా, యమున ఎక్స్ ప్రెస్ వే వంటి పలు రాష్ట్ర ప్రభుత్వ పథకాలను కేంద్ర ప్రభుత్వం ఆటంకపరుస్తోందని ఆమె విమర్శించారు. లోకసభ ఎన్నికలు కొద్ది నెలల్లో వస్తుండడంతో రాయబరేలీలో రైల్వే కోచ్ కర్మాగారాన్ని స్థాపించాలనే ఆలోచన కాంగ్రెసుకు వచ్చిందని ఆమె అన్నారు.

రాయబరేలీ రైళ్ల కోచ్ ఫ్యాక్టరీ కోసం తీసుకుంటున్న భూముల విషయంలో రైతులు చేస్తున్న ఆరోపణలపై ప్రిన్సిపల్ కార్యదర్శి విచారణ జరుపుతారని ఆమె చెప్పారు. మూడు రోజుల్లో ప్రిన్సిపల్ కార్యదర్శి తన నివేదికను ప్రభుత్వానికి సమర్పిస్తారని ఆమె చెప్పారు. ఆ తర్వాత ఆ అంశంపై మంత్రివర్గం తుది నిర్ణయం తీసుకుంటుందని ఆమె అన్నారు.